مویشی پال حضرات کو موسم گرما کے مویشیوں کے چارے کیلئے مکئی، سدا بہار، جوار،ماٹ گراس کی بروقت کاشت کی ہدایت

فیصل آباد (لائیوسٹاک پاکستان) مویشی پال حضرات کو موسم گرما کے مویشیوں کے چارے کیلئے مکئی، سدا بہار، جوار،ماٹ گراس کی بروقت کاشت کی ہدایت کی گئی ہے اور فی ایکڑ مکئی کا بیج 40،سدا بہار کا 15،جوا ر کا 30کلو گرام اور مارٹ گراس کی قلمیں و جڑیں 11ہزار رکھنے کا بھی مشورہ دیا گیا ہے۔اسسٹنٹ ڈائریکٹر محکمہ زراعت توسیع فیصل آباد خالد اقبال نے بتایاکہ موسم گرما میں عموماً سبز چارے کی قلت ہو جاتی ہے لہٰذا مویشی پال حضر ات، کاشتکاروں،زمینداروں کو چارے کی کاشت بروقت مکمل کر لینی چاہیے۔

انہوں نے بتایاکہ ماٹ گراس کی جڑیں مارچ اور قلمیں جولائی و اگست میں،مکئی کی کاشت مارچ سے ستمبر تک جبکہ جوار اور سدا بہار کی کاشت مارچ سے مئی تک مکمل کی جا سکتی ہے۔

انہوں نے بتایاکہ سبز چارے کی بہترین پیداوار حاصل کرنے کیلئے زمین کی تیاری بھی اہمیت کی حامل ہے لہٰذا کاشتکارزمین کو زرخیر بنانے کیلئے فی ایکڑ 15گڈے گوبر کی گلی سڑی کھاد استعمال کریں تاہم اگر گوبر کی کھاد دستیاب نہ ہو تو ایک ایکڑ رقبہ میں 3بوری ایس ایس پی اور آدھی بوری یوریا بوائی کے وقت جبکہ ایک بوری یوریا فی ایکڑ پہلی آبپاشی کے وقت ڈالی جا سکتی ہے۔انہوں نے بتایاکہ اس طرح جہاں سبز چاروں کی شاندار فصل حاصل ہو گی وہیں مویشی پال حضرات کوموسم گرما کے دوران سبز چاروں کی قلت کا سامنا بھی نہیں کرنا پڑے گا۔