چارہ لائیوسٹاک کی اہم خوراک،اس کی بہتر پیداوار کے لیے اقدامات جاری ہیں،ماہرین زراعت

فیصل آباد (لائیوسٹاک پاکستان) ماہرین زراعت اور سائنسدانوں نے کہا ہے کہ پاکستان کی معیشت کا زیادہ تر انحصار زراعت پر ہے اور اس شعبے میں لائیو سٹاک کا 55فیصد حصہ ہے، جانوروں کی خوراک کا سب سے بڑا ذریعہ سبز چارہ ہے اس لئے چارے کی معیاری اقسام کی وافر مقدار میں دستیابی یقینی بنانے کے لئے تمام ممکنہ اقدامات کئے جارہے ہیں۔

ایک بیان میں انہوں نے کہاکہ چارہ جات میں کمی کی بنیادی وجوہات میں کسانوں کا سبز چارے کی ترقی دادہ اقسام کے بیج اور جدیدپیداواری ٹیکنالوجی سے عدم تعارف ہے ، ہم جدید ٹیکنالوجی اپنا کر دیگر ممالک کی طرح چارے کی پیداوار میں خاطر خواہ اضافہ کرسکتے ہیں۔انہوں نے کہا کہ تجربات سے ثابت ہے کہ اگر ہم زمین کا صحیح انتخاب وتیاری، اچھا بیج، مناسب اور متناسب کھادوں کا استعمال، بروقت کاشت، برداشت اور دیگر زرعی عوامل اور ماہرین کی سفارشات پر عمل کریں تو چارہ جات کی فی ایکڑ پیداوار میں نمایاں اضافہ کرسکتے ہیں۔

انہوں نے کہا کہ چارے کی فی ایکڑ پیداوار میں کمی کی وجہ نئی اقسام کا بیج اور جدید فنی مہارتوں کو بروئے کارنہ لانا ہے کیونکہ غذائی اور نقد آور فصلوں کو مدنظر رکھتے ہوئے چارے کی پیداوار میں اضافے کےلئے ہم رقبے میں اضافہ نہیں کرسکتے۔ انہوں نے کہا کہ وقت کی ضرورت ہے کہ ہم ایسی منصوبہ بندی کریں جس سے چارہ جات کی فی ایکڑ پیداوار میں خاطر خواہ اضافہ ہوسکے۔