ترشاوہ پھلوں کے نئے باغات کیلئے فیصل آباد، ٹوبہ ٹیک سنگھ، سرگودھا، خوشاب، لیہ،وہاڑی،خانیوال، ساہیوال اورملتان زیادہ موزوں قرار
فیصل آباد (لائیوسٹاک پاکستان) ترشاوہ پھلوں کے نئے باغات کیلئے فیصل آباد ، ٹوبہ ٹیک سنگھ، سرگودھا، خوشاب، لیہ،وہاڑی،خانیوال، ساہیوال اورملتان وغیرہ زیادہ موزوں قراردیئے گئے ہیں اور کہا گیا ہے کہ مذکورہ علاقے ترشاوہ پھلوں کی پیداوار اور خصوصیات کے اعتبار سے بہترین علاقے تصور کئے جاتے ہیں جبکہ ترشاوہ پھلوں کی کامیاب کاشت کیلئے موزوں ترین درجہ حرات 25سے 35ڈگری سینٹی گریڈ ہے تاہم یہ 40ڈگری سینٹی گریڈ تک درجہ حرارت بھی برداشت کرسکتے ہیں۔
سٹرس ریسرچ انسٹی ٹیوٹ کے ماہرین اثمار نے بتایا کہ باغبان ترشاوہ پھلوں کے نئے باغات لگانے سے پہلے کم از کم 6.8 فٹ کی گہرائی تک زمین کی نچلی سطح کا معائنہ ضرور کروائیں اور اگر زمین کے اندر 4.3 فٹ تک نچلے حصے میں کنکر،ریت، چکنی مٹی کی تہہ نہ ہو تو زمین زیادہ موزوں ہو گی۔
انہوں نے بتایا کہ پاکستان میں ترشاوہ پھلوں کازیر کاشت رقبہ 5لاکھ ایکڑ سے زائد ہے جس میں سے پیداوار کا 95فیصد حصہ صوبہ پنجاب سے حاصل ہوتا ہے۔
انہوں نے بتایاکہ ترشاوہ پھلوں کیلئے میرا قسم کی زمین جس میں نامیاتی مادہ کی مقدار کم ازکم ایک فیصد تک ہو اور تھوڑی مقدار میں چونا بھی ہو بہتر تصور کی جاتی ہے۔انہوں نے بتایاکہ ترشاوہ پھلوں کے پودوں کی افزائش نسل بیج، قلم، داب اور چشمہ کے ذریعے ہوتی ہے کیونکہ بیج سے پودا تیار کرنا آسان ہے مگر پودے صحیح نسل کے نہیں ہوتے۔ انہوں نے باغبانوں کو سفارش کی کہ وہ ترشاوہ پھلوں کے نئے باغات لگانے کیلئے تجویز کردہ زمین اور ٹیوب ویل کے پانی کا تجزیہ کروائیں۔انہوں نے بتایاکہ آبپاشی کیلئے وافر نہری پانی کی فراہمی بہت ضروری ہے نیزمنتخب شدہ کھیت برلب سڑک ہو تاکہ منڈی تک پھل کی ترسیل میں آسانی رہے۔
