مویشی پال حضرات کوجانوروں کو منہ کھر کی بیماری سے بچانے کیلئے حفاظتی ٹیکے لگوانےکی ہدایت

فیصل آباد (لائیوسٹاک پاکستان) محکمہ لائیو سٹاک و ڈیری ڈویلپمنٹ نے جانوروں کو منہ کھر کی بیماری سے بچانے کیلئے فوری طور پر حفاظتی ٹیکے لگوانے کی ہدایت کی ہے۔ڈویژنل ڈائریکٹر محکمہ لائیو سٹاک و ڈیری دویلپمنٹ فیصل آباد ڈاکٹرحیدر علی خان نے کہا کہ لائیو سٹاک فارمرز مارچ واپریل کے دوران مویشیوں کو منہ کھر کی بیماری سے محفوظ رکھنے کیلئے حفاظتی ٹیکے ضرور لگوائیں تاکہ جانوروں کو کسی بھی قسم کی پیچیدگی سے بچایا جا سکے۔

انہوں نے کہا کہ منہ کھر کا وائرس بھینسوں، گائیوں، بکروں اور دیگر جانوروں کے منہ کی جلد، اوجھری، معدہ اور کھروں کے درمیان کھال پر حملہ کرتا ہے جس کے باعث متاثرہ جانوروں کونہ صرف تیز بخار ہو جاتا ہے بلکہ وہ خوراک کھانا بند کر دیتے ہیں اور دودھ کی پیداوار بھی کم ہونا شروع ہو جاتی ہے۔

انہوں نے کہا کہ اس بیماری میں بھینسوں اور گائیوں میں زبان، تالو، مسوڑھوں، ہوانہ، کھروں کے درمیان چھالکے بن جاتے ہیں اسی طرح بھیڑ بکریوں میں چھالکوں کی جگہ منہ میں سرخ دھبے بنتے ہیں اور منہ سے رال ٹپکنا شروع ہو جاتی ہے۔ انہوں نے کہا کہ تمام سرکاری ویٹرنری ہسپتالوں میں منہ کھر سے بچاؤ کی ویکسین بھاری مقدار میں موجود ہے لہٰذا لائیو سٹاک فارمرز یا دیگر افراد قریبی ویٹرنری سنٹر یا ویٹرنری ہسپتال سے رابطہ کر سکتے ہیں۔انہوں نےکہا کہ اس سلسلہ میں ایک فری ہیلپ لائن بھی قائم ہے اسلئے لائیو سٹاک فارمرز کسی بھی مسئلہ، معلومات، اطلاعات یا رہنمائی کیلئے صبح 9تا شام5بجے تک فری ہیلپ لائن پر رابطہ کر سکتے ہیں۔