پنجاب سے کپاس کی ریکارڈ پیداوارکے حصول کیلئے ٹھوس منصوبہ بندی کا آغاز

فیصل آباد (لائیوسٹاک پاکستان) کپاس کی ریکارڈ پیداوارکے حصول کیلئے ٹھوس منصوبہ بندی کا آغازکردیاگیا ہے جبکہ اس حوالے سے ماہرین،زرعی سائنسدانوں،کاشتکاروں اور کسان تنظیموں کے نمائندوں سے تجاویز لی جارہی ہیں نیز فصلوں کو دشمن کیڑوں سے بچانے کیلئے دوست کیڑے بنانے شروع کردئیے گئے ہیں جس کیلئے پنجاب بھر میں محکمہ زراعت کی 11لیبارٹریاں کیڑے بنانے میں مصروف ہیں۔

نظامت زرعی اطلاعات محکمہ زاعت کے ترجمان کے مطابق ان دوست کیڑوں کو بنانے کیلئے عملہ کو خصوصی تربیت دی گئی ہے جبکہ ان کیڑوں کو بنانے اور کھیتوں میں چھوڑنے کے بعد ان کی زندگی کا تحفظ بھی یقینی بنایا جا ئے گا جس بنا پر یہ دشمن کیڑوں کا دلیری سے مقابلہ کرسکیں گے نیز ان کیڑوں کوبنانے کے علاوہ کپاس کے حوالے سے آف سیزن مینجمنٹ فارمولہ پر بھی عمل جاری ہے اور دوسری فصلوں میں چھپے کپاس کے دشمن کیڑوں کو تلف کرنے کے بارے کپاس کے کسانوں کو آگاہی فراہم کی جارہی ہے۔

انہوں نے بتایا کہ کپاس کے کیڑے سردی میں دوسری فصلوں میں چھپ کر خود کو تحفظ فراہم کرتے ہیں اورسردیوں کے دوران نقصان رساں کیڑے تعداد میں کم ہوتے ہیں اور کپاس کی فصل کا بظاہر نقصان نہیں کرتے مگر آئندہ فصل کی آمد پر یہی کیڑے افزائش نسل کرکے ایک بڑے نقصان کا باعث بنتے ہیں اسلئے ان کو سردیوں کے دوران یا آئندہ فصل سے قبل کنٹرول کرنے کیلئے اقدامات کا سلسلہ تیز کردیا گیا ہے۔انہوں نے کہا کہ کپاس کی فصل سے فی ایکڑ زیادہ اور معیاری پیداوار حاصل کرنے کیلئے اس پر حملہ آور ہونے والے کیڑوں پر سارا سال نگاہ رکھنی چاہئے تاکہ کم لاگت سے بہتر نتائج حاصل کئے جا سکیں۔انہوں نے کہا کہ دشمن کیڑوں کا مقابلہ کرنے کیلئے دوست کیڑا کرائی سوپرلا انتہائی اہمیت کا حامل ہے جو اکثر زہریلے سپرے سے بھی محفوظ رہتا ہے۔انہوں نے بتایا کہ لیبز میں دوست کیڑوں کو سٹور کیا جارہا ہے تاکہ ضرورت پڑنے پر دشمن کیڑوں کا مقابلہ کر سکیں۔